పాపతో ...

ఆకాశంలో ఒద్దిగ్గా కూచుని
కారు మేఘాలన్నీ
చినుకు బలపాలతో
నేల మీద అక్షరాభ్యాసం చేస్తున్నాయి. 

ప్రతి అక్షరం నుండీ
ఒక పువ్వు పూసి 
వృత్తంగా మారి
అనంతంగా విస్తరిస్తోంది.

ఙ్ఞాన పుష్పం విచ్చుకుంటే
బ్రహ్మాండం కనిపిస్తుందని
చూపించడం కాబోలు!

తర్కానికీ తత్వాలకీ అందని
ఒకానొక ఆనందస్థితిలో 
పదే పదే ఆ నీటిని పొడుస్తూ
ఓ పిట్ట...
కేరింతలు కొడుతూ మా పాప... 

ఇంతకన్నా ఏం కావాలి!